Næsti foresetin í USA eitur eftir øllum at døma Joe Biden.
Í dag vísa valforsøgnir frá tíðindastovuni AP, at hann vinnur týdningarmikla svingstatirn Pennsylvania við 20 valmonnum – harvið er hann farin um markið 270 valmenn, sum krevst fyri at gerast forseti.
Tað er í valmannaráðnum, at avgerðin verður tikin, hvør verður næsti forseti í USA.
Tað er tí, at úrslitini í einstøku statinum og ikki í USA sum heild eru áhugaverd, tá greiða skal fáast á, hvør skal sita á odda fyri USA frá 2021 til 2025.
Her kanst tú fáa eina fatan av, hvat valmannaráðið er:
* Tað eru 538 limir í valmannaráðnum. Hvør statur í USA hevur eins nógvar valmenn, sum staturin hevur limir í teimum báðum kømrunum í Kongressini.
* District of Columbia, har høvðusstaðurin Washington er, hevur ongar limir í Kongressini við atkvøðurætti, men hevur kortini tríggjar valmenn.
* Av tí at talið av limum í øðrum kamarinum, Umboðsmannatinginum, er ásett eftir íbúgvunum í hvørjum stati sær, hava stórir statir fleiri valmenn enn smærri statir.
* Teir minstu statirnir hava tríggjar valmenn, meðan tann størsti, California, hevur 55.
* Tað skulu 270 valmannaatkvøður til at vinna valið. Valmenninir atkvøða so gott sum altíð upp á forsetavalevnini, sum veljararnir í statinum hava givið flestar atkvøður. Men teir eru ikki allastaðni formliga tvungnir til at gera tað.
* Skipanin við valmonnum merkir, at tað valevnið við flestum atkøvðum í øllum USA ikki altíð verður forseti.
* Vinnur eitt valevni stórt í einum stati við nógvum fólkum, men tapur tepurt í fleiri minni statum, kann tað valevnið standa eftir við flestu atkvøðunen færri valmonnum.
* Tað hendi í 2016, tá Donald Trump fekk 2,9 milliónir atkvøður færri enn Hillari Clinton. Men hann vann 306 valmenn ímóti 232 til Clinton.
* Valmannaráðið í hvørjum stati hittist í desember fyri at atkvøða, og á einum felags fundi í Kongressini eftir nýggjár verður valúrsltið váttað.
* Um einki valevni fær 270 valmenn, skal Umboðsmannatingið velja millum tey trý valevnini, sum hava fingið besta valið. Hvør statur hevur ein atkvøðu. Umboðsmannatingið hevur tvær ferðir avgjørt forsetavalið. Seinast var í 1824.
Keldur: BBC, Washington Post.
/ritzau/
