Avtalan er, at feløgini, sum byggja og arbeiða við leiðingum og øðrum veitingum, skulu vera liðug við sítt arbeiði um mánaðarskiftið. So verður eftir at rudda og vaska og at avgreiða tað, sum er eftir at tí, ið tað alla tíðina hevur verið roknað við, at sjálvboðin arbeiðsmegi skal syrgja fyri.
Ætlanin er, at bygninguin skal verða tikin í nýtslu eina ferð í mars mánað. Enn er ikki heilt greitt, nær tað verður, men tað hevur verið nevnt, at tað verður um hálvan mars.
Kanjon stendur fyri betong, timbur og jørðarbeiðnum. Innanduraarbeiðið hjá teimum er um at vera liðugt. Nú arbeiða teir á økinum kring bygningin. TTS í Klaksvík hevur havt el og ventilatións arbeiðið, og pf. Blikksmiðjan í Klaksvík hevur staðið fyri vvs arbeiðnum. Eisini teir eru um at vera lidnir.
Øll gólvini eru løgd við flísum. Tað arbeiðið er gjørt av sjálvbodnum undir leiðslu av Richardi Sørensen. Nýggi bygningurin verður hitaður við sjóhita. Tí verkætlanini hava sjálvboðin í Betesda staðið fyri.
Tað hevur verið nógv sjálvboðið arbeiði, og soleiðis er tað framvegis. Í vikuskiftunum verða stórt tøk tikin. Tá verður arbeitt frá klokkan fýra fríggjadag og inntil klokkan tíggju á kvøldi og so aftur leygardag frá klokkan átta og inntil klokkan fýra seinnapartin. Fríggjakvøldið verður nátturði bjóðaður og á middegi leygardagin er døgurði. Kaffi og te og bakstur eru alla tíðina at fáa hjá teimum, sum arbeiða og eisini hjá teimum, sum hyggja inn á gólvið.
– Tað hevur gingið væl, og undirtøkan hevur verið góð, sigur Kristian Martin Rasmussen, sum saman við Jóhan Páll Joensen fyri samkomuna hevur samskipað arbeiðið.
Sjálvbodna arbeiðið hevur fevnt um eitt nú – undir leiðslu av Magna Jacobsen - at pussa, spartla og mála og at leggja nógvu og framkomnu tøknina í sambandi við sang og tónleik.
Kostnaðurin varð roknaður at verða millum 27 og 28 milliónir krónur. Tá er virðið í sjálvbodna arbeiðnum ikki roknaður uppí.
Fyrsta vikuskiftið í mars vera tað tvey ár síðani, at síðsta samkoman var í gamla Betesda, sum stóð á somu grundini, har nýggi bygningurin er um at vera liðugur. Seinnapartin nú fríggjadagin verður samkoman fyri eldri, sum í vetrarhálvárinum er eina ferð um mánaðin. Sagt verður at hetta verður síðsta eldrasamkoman í hølunum við Klaksvíksvegin, har samkoman hevur hildið til, síðani í mars mánað 2012.
