Manchester City er nú einasta liðið í Premier League, sum ikki hevur roynt at tapt í hesum kappingarárinum. Tað hevði mótstøðuliðið leygardagin heldur ikki undan tí dystinum, men Newcastle hevði allíkavæl seks stig færri. Byrjanin hjá Manchester City er tann besta hjá nøkrum liðið í Premier League nakrantíð og liðið hevur upp á 12 dystir skotið 42 mál!
Tað merkist á høvuðstokstøðini í Manchester, Piccadilly, at fótbóltur er á skránni henda stilla og til tíðir heita leygardagin mitt í november. Løgreglufólk er at síggja, men stemningurin er avslappaður. Uttan fyri tokstøðina festir ein Newcastle-viðhaldsmaður sær í eina sigarett.
Hann er mitt í 20-unum, ílætin eini nýggjari Newcastle-troyggju, sum tó strammar eitt sindur meiri um búkin, enn hon ger hjá leikarunum. Hann hyggur eitt sindur spyrjandi upp á ein eitt sindur eldri mann í ljósabláari Manchester City-troyggju og hvítum og ljósabláum turriklæði.
Gesturin úr Newcastle spyr, hvussu hann lættast sleppur til Etihad leikvøllin, sum er heimstaðurin hjá Manchester City. Maðurin í ljósabláu troyggjuni er blíður og forklárar dúgliga við bæði fartelefon og peikar í eyst og vest.
Jú, stemningurin tykist vinarligur og avslappaður á Piccadilly, hóast tað eru tvey lið í oddanum, sum bresta saman um fáar tímar.
Nakrar hundrað metrar frá tokstøðini er støðan ein onnur. Uttan fyri skeinkistaðið The Waldorf er løgreglan boðsend. Ein BMW-jeepur og ein vøruvognur fullur av løgreglumonnum standa uttanfyri. Løgreglan prátar við ein mann í Newcastle-troyggju, sum nokk ikki hevði klárað at gingið eftir einari beinari linju longri enn tvey fet.
Fleiri hava hug at forvitnast, men ein løgreglumaður ger skjótt av og sigur, at einki er á vási og at fólk skulu fara víðari.
Flottir bilar
Uttan fyri Etihad-leikvøllin hava vaktirnir úr at gera við at fáa parkera bilarnar hjá leikarum, arbeiðisfólkum og stuðlum. Tað er skjótt og lætt at síggja, hvørjar bilar leikararnir eiga. Teir eru flottir og vanligi maðurin hevur bara ráð at keypa eina mynd av teimum.
Við innkoyringina ljóðar í samskiftistólinum hjá einum ungum manni, at hvíti bilurin, sum er á veg, skal inn á eitt ávíst parkeringspláss og bilurin skal parkerast fyri hann.
Løtu seinni kemur so ein hvítur nývaskaður bilur, sum kundi verið ein pyntaður Austin Martin ella ein Bentley. Úr bilinum kemur ein maður í kovboybuksum og smartari troyggju. Vakturin tekur billyklarnar frá honum og smílist upp á mannin og spyr hví hann ikki er við í dag.
Maðurin í bilinum er argentinski landsliðsleikarin, Pablo Zabaleta. Hann svarar við einum lítlum smíli, meðan hann hampar upp á troyggjuna og buksurnar:
– Eg kom so seint heim frá landsliðssteðginum við Argentina, sigur hann og byrjar at ganga móti inngongini.
Onkur Manchester City-viðhaldsfólk hava borðið eyga við hann, men fólk tykjast nú ikki so óvon við støðuna og hann fær frið at ganga teinin til inngongdina.
Tónleikafestivalur
Uttan fyri sjálvan leikvøllin buldrar tónleikur av einum palli. Kendi enski tónleikabólkurin, Oasis, eru nokk kendastu Manchester City-fjepparnir, men tað eru nú ikki teir, ið hava stilla seg á pallin. Heldur er tað ein bólkur av ungum tónleikarum, ið syngja og spæla eyðkennislagið hjá Manchester City, Blue Moon.
Stutt frá pallinum stendur ein pylsuvongur og fleiri nýta høvið at fáa sær okkurt at eta. Onkur fær sær eisini eina skál av chips og tað skuldi vísa seg ikki at verða so býtt!
Hinumegin leikvøllin er nærmast afrikanskur tilstandur. Við trummum og blásiljóðføri megnað nakrir ungir mans at undirhalda flestu av fótbóltsviðhaldsfólkunum rundanum. Aftur her er tað eyðkennislagið hjá Manchester City, Blue Moon, sum verður spælt.
Uttan fyri inngongina hjá Newcastle-viðhaldsfólkunum syngja fleiri av teimum í felag, at verjuleikarin, Fabricio Coloccini, er vælkomin at vitja konuna hjá teimum, og at teir vilja hava krúllur, eins og argentinski verjuleikarin hevur. Tey flestu, sum eru hjástødd, kunnu ikki annað enn flenna at heldur ónærisliga sanginum.
Fyrri hálvleikur
Á sjálvum vøllinum hevur Manchester City takið á spælinum og ræðandi breiddin á City-liðnum kemur til sjóndar, tá nøvnini á leikarum á bonkinum hjá heimaliðnum verða rópt upp. Edin Dzeko, David Silva, Alexandar Kolarov, Gareth Barry, Kolo Toure og Adam Johnson. Hjá Newcastle fær 19 ára gamli Sammy Ameobi møguleikan frá byjan. Hann hevur annars verið nógv at sæð á eykaliðnum saman við toftamanninum, Jóan Símun Edmundsson.
Fyrstu fjøruti minuttirnar er minni munurin á liðnum. Bæði hava stórar møguleikar, men annars er dysturin ikki tað stóra at reypa av. Á áskoðaraplássunum eru tey 4.-5.000 Newcastle-viðhaldsfólkini mælskari enn teir yvir 40.000 vertirnir.
Stutt fyri hálvleik kemur hol á. Dómarin bríkslar fyri brotssparki og umstríddi italiumaðurin, Mario Balotelli, er tryggur úr ellivu metrum. Tá hann skorar, stendur hann hendur í favn og hyggur nirðandi eftir Tim Krul í Newcastle-málinum. Hollendski málverjin hevur tó sjálvur biðið um tað, tí tá Mario Balotelli legði sær bóltin til rættis, kom málverjin og sparkaði bóltin vekk uttan orsøk.
Bara fáar minuttir seinni er aftur mál. Høgri bakkurin hjá Manchester City, Micah Richards, er komin framvið og økir til 2-0, tá verjan hjá Newcastle ikki fær ruddað vekk.
»Vit skora, tá vit hava hug! Vit skora, tá vit hava hug! Vit eru Manchester City og vit skora, tá vit hava hug!« Soleiðis verður brølað út yvir leikvøllin og rætt hava City-fjeppararnir, tí Manchester City hevur ikki verið til at steðgað higartil í ár.
»Ongi chips«
Beint sum dómarin skal bríksla fyri hálvleiki, kemur í øði í áskoðararnar. Úr hoytalarinum verður boðað frá, at eingi chips eru at fáa í hálvleikinum. Hetta fær alla áskoðarafjødina at geyla, men tó bara í skemti.
Tað gongur bara ein lítil løta, so tríva øll Manchester City-viðhaldsfólkini í felags róp og peika yvir á Newcastle-viðhaldsfólkini. »Tit hava etið øll chipsini! Tit hava etið øll chipsini! Tykkara feitu lortungar, tit hava etið øll kipsini!«
Hóast málburðurin kann vera nakað harður, so er ikki ilt millum áskoðararnar hjá liðunum báðum.
Skemtisøgurnar fingu eisini bein at ganga á og fólk fóru at tosa um, at chipsini vóru í køkinum, men noktaðu at hita upp, eins og Carlos Tevez móti Bayern München.
Seinni hálvleikur
Í seinna hálvleiki er Newcastle nær við at minka um munin og tú situr við eini kenslu av, at eydnast tað teimum, so kunnu teir gott fáa eitt stig. Men tá Hatem Ben Arfa rakar stongina úr góðari støðu, so er tað helst eisini ein ábending um, at hetta verður ikki dagurin hjá teimum.
Eitt korter fyri tíð verður Micah Richards feldur í Newcastle-brotsteiginum og so er aftur brotsspark. Svigarsonurin hjá Diego Maradona, Sergio Aguero, er tryggur og so er dysturin avgjørdur.
Stutt eftir málið kemur øði í grindina. Í horninum aftan fyri málið, sum Sergio Aguero akkurát hevur skorað í, má løgreglan leggja upp í. Tað er stutt millum viðhaldsfólkini hjá liðunum báðum og vaktirnar hava nú ilt við at halda frástøðuna millum viðhaldsfólkini. Løgreglan leggur upp í og stutt eftir er alt sum tað skal verða aftur.
Newcastle minkar um munin í evstu løtu, men tað bilar minni, tí Manchester City hevur enn eina ferð í ár greitt sína skyldu. Ein rímiliga tryggur 3-1 sigur á Newcastle, sum tó hevði møguleikar at skapa ein meiri spennandi dyst.
Eitt meistaraboð
Tað var sól og heitt undan dystinum, men nú er klokkan skjótt fimm og sólin er farin at ferðast kring heimin og verður ikki aftur fyrr enn sunnudagin. Tað er kalt og myrkt og fólk skunda sær heim.
Við høvðusinngongina til leikvøllin stendur ein maður og selur plakatir. Hendan plakatin kostar beint undir tjúgu krónur og hevur heitið, »Derby massacre«. Hon gjørd til Manchester City-viðhaldsfólkini, ið vilja minnast 6-1 sigur á Manchester United á Old Trafford fyrr í hesum kappingarárinum.
Manchester City hevur bara mist tvey stig í ár og liggur fimm stig framman fyri grannarnar úr Manchester United. Breiddin á liðnum er nærmast óhugnalig og heldur liðið fram við at skjóta mál, sum tí lystir, so man tað bila minni, at eingi chips eru í hálvleikinum.
