Sosialurin: 23 ára gamli Beinir Troest hevur gjørt nógv um seg á føroyska tónleikapallinum, líka síðan hann var heilt ungur, og í 2021 flutti Beinir til Danmarkar at savna seg um tónleikin.
Tað hava verið tvey hendingarrík ár hjá Beini á flatlondum higartil. Hann hevur verið á konsertferð við heilt stórum donskum nøvnum so sum Stine Bramsen, Dopha og Jonah Blacksmith, sum hann eisini framførdi við á Summar Festivalinum í ár. Konsertirnar hjá Beini hava fingið sera góð ummæli frá tónleikatíðarritunum GAFFA og Bands of Tomorrow, og nú er Beinir Troest aftur úti við nýggjum tónleiki.
– Eg havi ofta hugsað, at tað kundi verið kul at givið onkran meira svakligan popp út, men at útgeva okkurt í hesum stílinum er erligt og nakið og tað, sum eg føli meg tryggast við, sigur hann um staklagið »Greener«, sum júst er komið út í dag.
Á nýggja staklagnum syngur Beinir um at tveita seg úr tí kenda og heimliga umhvørvinum inn í tað ókenda og um tær broytingar og avbjóðingar, hann møtir á vegnum.
– Fyri meg snýr lagið seg um at taka kjansin. At velja tað ókenda, men eisini tað, sum eg veruliga brenni fyri, fram um tað trygga og kenda, fortelur Beinir og leggur afturat, at hóast hann er uppvaksin í einum tryggum umhvørvi, velur hann kortini at halda, at grasið er grønari hinumegin. Tað er eisini hiðani, hann hevur fingið íblástur til heitið á lagnum. Lagið er eisini merkt av ótryggleikanum av at hugsa so, men at taka avgerðina kortini.
– Lagið snýr seg eisini nógv um iva og ótryggleika hjá mær sjálvum í at velja eina so óvanliga lívsleið og siga við meg sjálvan »okey, nú tekur tú altso stigið«.
Lagið er upptikið live í Grapehouse Studio, sum eisini hevur hýst kendum donskum nøvnum sum millum annað Saybia, Thomas Helmig og Dizzy Mizz Lizzy.
Er tað av einari serligari orsøk, at hetta er fyrsta staklagið av komandi plátuni?
– Eg havi alla tíðina hugsað hetta lagið sum tað fyrsta á plátuni. Tað hoyrist ein dámur av Greener á øllum hinum løgunum. Greener er onkursvegna hjartað í nýggju plátuni.
Hoyra Greener her:
##med2##
Vil liva av tónleikinum
Hvat er dreymurin hjá tær?
– Dreymurin hjá mær er fyri tað fyrsta at sleppa í útvarpið í Danmark. Langtíðarætlanin er at fara á mínar egnu konsertferðir her í Danmark og so smátt flyta meg móti Týsklandi eisini.
Ynskir tú at liva av at skriva tónleik?
– Ja, altso at liva av tí og sleppa at deila mín tónleik við eina fjøld, sum leggur í tað, sum eg geri. Eftir tað fari eftir at spæla á Wembley!
Les longri samrøðu við Beinir í Sosialinum...
