Kappróðrarárið er spakuliga farið í gongd. Fyrsta umfar av Ódnartak var fyri tveimum vikum síðani í Havn, meðan annað umfar verður í dag klokkan 13.00 í Runavík. Norðoyastevnan liggur skamt fyri framman og rógvararnir hava longu vant dúliga í fleiri mánaðir.
Onkur róðrarfeløg hava tó rent seg í óvæntaðar trupulleikar, teirra millum tvey av feløgunum í høvuðsstaðnum, Arga Róðrarfelag og Róðrarfelagið Knørrur. Tað vísir seg nevniliga, at tveir bátavognar hjá teimum eru horvnir.
Bæði harmast tey um hetta, tí teimum tørvar vognarnar, og heita tí á fólk, ið vita nakað um, hvar vognarnir eru, ella vita, um onkur hevur lænt teir, um at seta seg í samband við róðrarfeløgini, so vognarnir kunnu koma upp á pláss aftur.
Argja Róðrarfelag sigur, at vognurin plagdi at standa uttanfyri neystið, men nú er hann ikki at finna.
Róðrarfelagið Knørrur sigur, at vognurin hevur staðið á Heygnum Mikla í Havn, men er horvin millum 5. og 11. desembur. Vognurin hevur nummarplátuna UA 311.
