Í dag, 20. November, eru 25 ár liðin síðani ST Barnarættindasáttmálin varð settur á dagsskrá, og í tí sambandi verður serligt ljós varpað á hesi rættindini.
Annlis Bjarkhamar frá átakinum 'Í menniskjum góður tokki' vísir á, at tað eru børn, sum eru mest útsetti bólkurin, tá tað fátækradømi í Føroyum.
- Í 300 teimum fátækastu familjunum eru áleið 500 børn, og hesi hava ofta ikki meira enn eina 20 krónu at liva fyri um dagin, sigur hon.
Tær allarflestu av hesum familjunum eru inni í almennum skipanum, sum eitt nú ALS og almennari forsorg. Annlis Bjarkhamar metir tó, at hesar almennu veitingarnar eru alt ov lágar, og onkursvegna skúgva veruliga trupulleikan burtur.
- Tá ið fólk fáa hesa upphæddina, so hava myndugleikarnir lyndi til at gloyma tey burtur aftur. Tað átti tískil at verið eitt veruligt fátækramark, sigur hon.
Hon heldur, at politiska valdi átti at gjørt okkurt við hetta, áðrenn at fíggjarlógin er endaliga samtykt.
- Politikarirnir kunnu framvegis gera okkurt við hetta, og tað hevði munað væl at hækka verandi barnaískoyti við 1.500 krónum, sigur Annlis Bjarkhamar.
Trýst á pílin undir myndini og hoyr alla samrøðuna við Annlis
