Hóast tað er feriutíð, so er líkt til, at leiðslan í Sambandsflokkinum ikki sleppur heilt avstað enn.
Tá vit í kvøld fingu orðið á Bárð á Steig Nielsen, næstformann í Sambandsflokkinum, segði hann, at málið um kanningina hjá Hans Gammeltoft Hansen, skal viðgerast innanhýsis.
- Einasta viðmerkingin, sum eg havi í kvøld, er, at eg onga viðmerking havi. Nú hevur hetta málið koyrt í allan dag, og eg eri endurgivin fyri tað, sum eg segði fyri einum ári síðani. Tey orðini havi eg sjálvandi sagt, men eg sigi ikki meira enn tað sama í kvøld, sigur Bárður.
Hann leggur tó afturat, at niðurstøðan hjá kanningarstjóranum fær sína viðgerð í flokkinum.
- Hetta skal sjálvandi viðgerast væl og virðiliga í flokkinum. Men her og nú havi eg altso onga viðmerking, staðfestir Bárður á Steig Nielsen.
