Í síðstu viku var Krabbameinsfelagi á fundi í Nordic Cancer Union, NCU, sum er eitt felag, har øll tey norðurlendsku krabbameinsfeløgini eru limir.
Í løtuni hevur Føroyar formansskapin í NCU og á myndini eru umboð fyri øll tey norðurlendsku krabbameinsfeløgini uttanfyri Norðuratlantsbryggjuna.
Nógv áhugaverd mál vóru á skránni á fundinum, eitt nú skuldi NCU velja formann til Vísindaligu nevndina undir NCU, sum árliga býtir út einar fimm milliónir krónur í stuðli til gransking í krabbameini í Norðanlondum.
Semja varð um at Johan Poulsen, føroyskur yvirlækni, skal verða formaður í Vísindaligu nevndini næstu trý árini ímeðan Føroyar hevur formansskapin í felagnum.
Umframt hetta var húðkrabbi á skránni. Húðkrabbi er vaksin við fullari ferð í Norðanlondum seinastu árini.
Orsøkin til hetta er, at vit ofta brenna okkum í sólini og brúka ov nógv solarium.
Talið av tilburðum veksur bæði fyri menn og kvinnur í Norðanlondum og einki týðir uppá, at talið av tilburðum fer at lækka. Tvørturímóti.
Í 2011 hevði Danmark tann ivasama heiður, at seta heimsmet í tilburðum av húðkrabba fyri kvinnur í aldrinum 15-39 ár.
Fyri at gera eina roynd at venda gongdini, hevur NCU gjørt av at stuðla einari verkætlan, ið hevur til endamáls at fyribyrgja húðkrabba í øllum Norðanlondum.
Í hesari verkætlan skulu øll Norðanlond, í samstarvi við ferðavinnuna og lýsingafyritøkur, arbeiða fram ímótir at fyribyrgja húðkrabba.
Hvørt limaland hevur valt sítt umboð til verkætlanina, og føroyska umboðið er Brynhild Høgnadóttir.
Næsti fundur í NCU verður í Føroyum tann 9. og 10. september 2012.
Um ein hálvan tíma fer at bera til at lesa á Portalinum, at Karsten Hansen, landsstýrismaður í heilsumálum, hevur í hyggju at seta bann fyri, at ung undir 18 ár skulu sleppa at brúka solarium
