Fyrrverandi Manchester United-leikarin, Gary Neville, sum nú starvast sum serfrøðingur hjá Sky Sports, heldur tað ikki vera løgið, at United er 16 stig aftanfyri grannarnar úr City í Premier League.
Neville, sum spældi 19 kappingarár við Manchester United, sigur bart út í samrøðu við Goal, at liðið manglar leikarar í heimsflokki.
- David de Gea er einasti leikarin hjá teimum, sum er í heimsflokki, sigur hann og heldur fram:
- Tú kanst møguliga eisini siga Alexis Sanchez, men ikki reiðiliga enn í Manchester United. Seinastu fimm ella seks árini hevur hann avrikað á einum støði, ið tú kanst siga er í heimsflokki.
Umframt teir báðar, so hevur Gary Neville eisini gott eyga á tí spælaranum, sum spælir á sama plássi sum hann sjálvur gjørdi, nevniliga á høgra bakki.
- Ein annar leikari, ið hevur spælt væl, um tað so er í heimsflokki ella ikki, er Antonio Valencia. Hann hevur verið framúrskarandi seinastu tvey-trý árini, sigur Gary Neville og leggur at enda afturat:
- Men David de Gea er veruliga tann einasti leikarin, ið skilir seg burturúr hópinum. Eingin ivi um tað.
