Í dag fer danski búskaparmálaráðharrin, Brian Mikkelsen, at kunna aðrar politiskar flokkar um eitt uppskot, sum hevur til endamáls at býta kreppuraktar bankar sundur. Málið er, at Fíggjarligt Støðufesti yvirtekur tey vánaligu lánini hjá einum kreppuraktum banka, og hin parturin av bankanum verður lagdur saman við einum vælvirkandi banka.
Uppskotið verður lagt fyri teir flokkarnar, sum vóru við í semjuni um Bankapakka III, skrivar Jyllandsposturin. Blaðið sigur, at ráðharrin fer at leggja fleiri onnur uppskot fyri flokkarnar, og at talan er um ein pakka.
