Kyst.no, sum vísir til eina frágreiðing hjá Nordea, endurtekur søguna um, at Bakkafrost í september keypti meirilutan av partabrøvunum í The Scottish Salmon Company (SSC). Keypið merkir, at Bakkafrost við skotska alifelagnum økir um árligu framleiðsluna av laksi við 32.000 tonsum.
- Við keypinum er framleiðslan hjá Bakkafrosti nú meira enn 85.000 tons um árið, og tá væntaði vøksturin í báðum alifeløgunum tey næstu árini verður havdur í huga, fer árliga framleiðslan av laksi um tey 100.000 tonsini, áðrenn vit skriva 2022, skrivar kyst.no
Nordea heldur, at týdningarmiklastu samvirkanarárinini við keypinum av The Scottish Salmon Company - umframt lægri fastar útreiðslur til høvuðsskrivstovu og starvsfólk - kunnu knýtast til, at Bakkafrost longu hevur fóðurframleiðslu, sølu-og marknaðarføring.
