Rannvá D. Carlsson fær ein strævnan dag í morgin.
Í dag spældi hon seg nevniliga í sína aðru finalu á hesum oyggjaleikunum, í blandaðum tvímansleiki, men umframt finaluna í tvímansleiki hjá kvinnum skal hon eisini spæla bronsudyst í einmansleiki fyri kvinnur. Eisini tann dysturin verður spældur í morgin.
Spurningurin er so, um skráin kann leggjast soleiðis, at Rannvá Carlsson kann fáa eitt sindur av luft millum dystirnar ella, um teir koma slag í sag. Í øllum førum verður talan um ein strævnan dag.
Fýra føroysk lið vóru við í blandaðum tvímansleiki í dag, men bara Rannvá Carlsson og Niclas H. Eysturoy megnaðu at spæla seg í finaluna. Tað gjørdu tey við at vinna á Isle of Man í hálvfinaluni, og tí skulu tey bæði í morgin spæla finalu móti Guernsey.
