Leygardagin 20. mai verður árliga Bátastevnan í Vestmanna, har bátar og smærri før úr øllum Føroyum seta hvørjum øðrum stevnu í Vestmanna. Hetta er fimta árið á rað, at bátastevnan verður hildin í Vestmanna í mai mánaði, og tiltakið hevur verið ógvuliga væl umtókt. Undanfarin ár hava upp í 200 bátar úr øllum landinum sett stevnu í Vestmanna.
Av tí at Bátastevnan í Vestmanna er so væl umtókt, og nógvir bátar vitja, hava fyrireikarnir gjørt av at betra um atløguviðurskiftini. Vestmanna Ítróttarfelag hevur fingið til vega nakrar bátabrúgvar til endamálið, og ætlanin er at leggja bátabrúgvarnar út í bátahylin, soleiðis at mongu bátarnir koma at liggja trygt og væl. Arbeitt verður í løtuni við at gera bátabrúgvarnar klárar.
Eisini verða viðurskiftini hjá teimum nógvu vitjandi campingvognunum betrað. Campingvognarnir fáa avlagt eitt øki við ferjuleguna Inni á Fjørð, og har verður møguligt at fáa vatn og el, umframt at sanitetsviðurskiftini verða góð.
Vestmanna Ítróttarfelag væntar, eins og undanfarin ár, at tiltakið fær minst líka góða undirtøku í ár og bjóðar hervið øllum áhugaðum vælkomnum á Bátastevnu 2006 í Vestmanna, leygardagin 20. mai 2006.
