Fríggjadagin samtykti Løgtingið einmælt broyting í lógini um heilsutrygd, sum merkir, at børn undir 18 ár ikki longur skulu rinda fyri tilskotsheimilaðan heilivág. Broytingin kemur í gildi 1. juni 2013.
Tá ið tú keypir heilivág, fær tú tilskot frá Heilsutrygd, um heilivágurin er tað, sum rópast tilskotsheimilaður. Tilskotsheimilaður heilivágur er mest nýtti heilivágur í viðgerðum, sum verða veittar í Føroyum.
Skipanin í dag er soleiðis, at øll sum keypa heilivág fáa tilskot til útreiðslur, sum eru omanfyri 500 krónur um árið. Børn og ung rinda tó ongantíð meira enn umleið 1.200 krónur árliga. Fyri foreldur, sum hava fleiri børn, ið tørva heilivág, kunnu útreiðslurnar til heilivág gerast lutfalsliga høgar. Tað er ikki óvanligt at ein familja hevur fleiri børn, sum hava tørv á tilskotsheimilaðum heilivági.
- At gerast sjúkur og tørva heilivág, skal ongantíð gerast ein fíggjarligur smeitur fyri familjuna. Tí fegnist eg um, at Løgtingið tók undir við at dagføra skipanina soleiðis, at børn frameftir ikki skulu gjalda egingjald, sigur Karsten Hansen, landsstýrismaður við heilsumálum.
Broytingin í tilskotsskipanini er útreiðsluneutral. Kostnaðurin av broytingini í skipanini verður fíggjað við at tey, sum keypa nógvan heilivág koma at rinda um 30 kr. meira um mánaðin fyri tilskotsheimilaðum heilivági.
