Menningarætlan
Johan Dahl skilir onki.
Hendrik Old má hava nakrar dagar at summa seg í.
Tað er støðan eftir ein fund í Vági leygardagin ímillum landsstýrið og Vágs Býráð.
Tað vóru landsstýrismaðurin í skúlamálum, Jógvan á Lakjuni og landsstýrismaðurin í almanna- og heilsumálum, Hans Pauli Strøm, við sjálvum løgmanni á odda, sum høvdu fund við Vágs Býráð leygardagin.
Á tí fundinum skeyt landssstýrið upp, at miðnámsskúlin, sum grivið er út fyri í Vági, verður fluttur til hovs ístaðin og bygdur sum ein partur av einum skúladepili har.
Afturfyri skal eitt røktarheim til 35 fólk byggjast, har miðnámsskúlin varð ætlaður í Vági.
Men sum tað sæst aðrastaðni í blaðnum, vísti Vágs Býráð ætlanini frá sær.
Skilji onki
Johan Dahl er løgtingsmaður fyri Suðuroynna og hann er hartil limur í samgonguni og limur í politiska arbeiðsbólkinum, sum skuldi royna at vísa á tiltøk, sum kundi fáa gongd aftur á í Suðuroynni.
Hann var við fundinum í Vági sum eygleiðari. Og hann skilir ikki støðuna hjáVága Býráð.
? Vit hava hugsað um ymsar møguleikar at seta almenn arbeiðspláss á stovn í Suðuroy, sum krevja útbúgvingar.
? Og eitt røktarheim í Vági til 35 fólk, er eisini eitt støðugt, alment arbeiðspláss til 35-40 fólk.
Umframt starvsfólkini á sjálvum røktarheiminum, førir tað nógv avleitt virksemi við sær, eitt nú vaskarí, køk o.s.fr.
?Hava vágbingar ráð til at siga nei til 35-40 almenn arbeiðspláss, skilji eg onki, leggur hann afturat.
Tí kom tað ógvuliga óvart á løgtingsmannin, at Vágs Býráð havnaði ætlanini.
Hann vísir eisini á, at hetta eru støðug arbeiðsplás, sum eru fullkomiliga óávirkað av gongdini í fiskivinnuni ella sveiggjunum í búskapinum annnars.
Og so er tað næstan bara talan um konufólkastørv, sum tað er harðliga brúk fyri í Suðuroy.
Hann sigur, at orsøkin til, at miðnámsskúlin og røktarheim eru tengd saman er fyri at fáa politiska undirtøku fyri ætlanini, tí við at leggja bæði heilsuskúla og miðnámsskúla saman í Hovi, verður tað bíligari.
Johan Dahl sigur, at hetta var bara eitt tilboð.
? Bólturin liggur nú hjá Vágs Kommunu og so má býráðið hava málið til umhugsunnar og taka eina endaliga støðu.
Hann sigur, at annars verður arbeitt við øðrum ætlanum fyri Suðuroynna.
? Men tað er ikki í hesum málistokkinum, leggur hann afturat.
Sí eisini samrøður við Hans Paula Strøm, Jógvan á Lakjuni, Løgmann og borgarstjóran í Vági
Summa seg
Hendrik Old, sum er hin løgtingsmaðurin úr Suðuroy, sum situr í samgongu, hevur onga viðmerking í løtuni.
Hann var eisini við á fundinum sum eygleiðari. Og at kommunan havnaði tilboðnum, kom so óvart á hann, at hann má fáa nakrar dagar at summa seg í, sum hann tekur til.
