Hóast hon longu er yvir ein mánað, fer bíðitíðin eftir at sleppa í MR-skannaran á Landssjúkrahúsinum væntandi at veksa komandi tíðina. Tað upplýsir Sirið Stenberg, landsstýriskvinna í heilsumálum fyri Kaj Leo Holm Johannesen, tingmanni, í einum §52a-fyrispurningi.
Løgtingsmaðurin hjá Sambandsflokkinum hevur spurt landsstýriskvinnuna, hvussu long bíðitíðin at sleppa í CT og MR-skannara er og hvussu nógv hesir verða brúktir.
Sirið Stenberg svarar, at eingin bíðitíð er eftir at sleppa í CT-skannara, meðan bíðitíðin at sleppa í MR-skannara er ein mánað, í onkrum føri upp í tríggjar mánaðir. Hon sigur eisini, at bíðitíðin kann vaksa komandi tíðina.
- Um ongar tillagingar verða gjørdar, fer bíðitíðin til MR-skannaran væntandi at økjast sum frá líður, av tí at eftirspurningurin er størri enn verandi kapasitetur, sigur hon.
Hon upplýsir, at meðan CT-skannarin verður brúktur hvønn gerandisdag, verður MR-skannarin einans brúktur tveir dagar um vikuna.
Sirið Stenberg sigur, at nýtslan av MR-skannaranum er nógv voksin seinastu árini, nærum tvífalt síðani 2013. Tá vóru 792 MR-skanningar árliga, nú eru tær 1.549 um árið. Árligi vøksturin er eini 19 prosent.
- MR-skannarin verður brúktur so nógv, sum starvsfólka orka er til. Um skannarin skal nýtast meira enn nú, er neyðugt at knýta fleiri starvsfólk at MR-skannaranum, sigur Sirið Stenberg, sum í næstum fer á fund við sjúkrahúsleiðsluna at umrøða spurningin.
Hon sigur, at um MR-skannarin skal nýtast dagliga, fer tað at kosta 1,6 milliónir krónur í øktum starvsfólkaútreiðslum og innkeyp av myndagreiningum.
Munurin á CT og MR skannara hevur mest við tøknina at gera. Ein CT-skannari er eitt slag av røntgen, har strálur verða skotnar gjøgnum likamið og maskinan síðani ger eina mynd av úrslitunum.
Ein MR-skannari er at líkna við eina stóra magnet. Magnetisman ger, at likamið sendir nøkur signal, sum skannarin síðani setur saman til eina mynd.
Vanliga verður sagt, at meðan MR-skanning gevur neyvari úrslit, serliga tá talan er um bleytpartar, egnar CT-skanning seg betri til skanning av beinagrindini. Endamálið við skanningini avgerð, hvat slag av skannara verður nýttur.
