Bíðað eftir stóru íleggjar­unum

Onki fæst í løtuni at vita um, hvørt upp­sjóvar­v­irkið í Fugla­firði verður egg ella ungi. Sigurð S. Simon­sen er sjálvur stjóri í nýstovnaða felag­num Enni. Enni er íleggingarfelag fyri smærru íleggjararnar - einstaklingar, virki og fakfeløg. Hetta felag­ið skal ætlandi eiga 10 prosent av parta­pen­ingi­num í nýggja upp­sjóvar­virkinum. Restin kem­ur frá stórum íleggjar­um, og teir sum hava víst størst áhuga eru Bakkafrost/Havs­brún og Framherji. Sum skilst verður eisini roynt at fáa p/f Christ­ian í Grótinum, sum eigur Norðborg og Christ­ian í Grótinum upp í eisini.
Virkið er mett at kosta umleið 200 millión­ir krónur, og partapeningurin verður umleið 60 milliónir krónur. Tað merkir, at Enni fer at eiga seks milliónir krón­ur av parta­pen­ing­inum, meðan restin skal koma frá teimum stóru.
Men hesir hava gjørt av onki at siga um verkætlanina í løtu­ni.
- Vit skulu nokk lata frætta frá okkum, tá okkurt er at siga, og í løtuni hava vit onki at siga, sigur Regin Jacob­sen, stjóri á Bakka­frost, sum eisini eigur Havs­brún.
Bakkafrost er skrá­sett á norska børsi­num í Oslo, men Regin Jacobsen vísir aft­ur, at tað eru atlit til børs­in, ið avmarka frá­søgu­hug­in.