Seinastu dagarnar hava fleiri dystir verið í bestu kvinnudeildini. Mikukvøldið 19. juni vóru tveir dystir, sum sambært skránni áttu at verið 6. juli, og í vikuskiftinum vóru tríggir dystir. Burtursæð frá ÍF-HB, sum er á skránni 6. juli, so verður nú summarfrí fram til sunnudagin 18. august.
Í toppinum er støðan óbroytt. EBS/Skála er eftir ellivu umfør á odda við 30 stigum, og KÍ hevur 28 stig. Tað eru bara hesi bæði liðini, sum kappast um FM heitið. Burtursæð frá at KÍ herfyri ikki megnaði meiri enn javnleik í Gundadali ímóti B36, so hava úrslitini lagað seg soleiðis, sum tað kundi roknast við. KÍ vann mikukvøldið trilvaligan sigur á AB á útivølli, og EBS/Skála hevur vunnið á B36 á heimavølli og Víkingi á útivølli, uttan at nakað mál er farið ígjøgnum hjá oddaliðnum.
Um tað næstu nógvu ferðirnar fer at laga seg soleiðis, sum tað higartil hevur gjørt, so er tað sannlíkt, at FM finalan verður í Klaksvík mikudagin 11. september, tá ið EBS/Skála og KÍ bresta saman í Klaksvík.
HB og B36 eru í tættari kapping um bronsuplássið, ÍF hevur næstan tryggjað sær fimta plássið, Víkingur er nummar seks, og AB eigur framvegis fyrsta sigurin til góða.
