Samstarvsavtalan, sum føroyski og íslendski mentamálaráðharrin skrivaðu undir seinasta sunnudag í Norðurlandahúsinum, er søgulig og er byrjanin til eitt samstarv, ið fevnir bæði um gransking, skúlaskap og mentan.
Íslendingar eru ógvuliga frammalaga í øllum hesum viðurskiftum, eru slóðbrótandi og ganga undan, og vit kunnu læra nógv av teimum. Men andin í samstarvsavtaluni er sjálvandi, at hon skal galda báðar vegir. Og á vitjanini í Føroyum seinasta vikuskiftið fekst longu ein varhugi av, at føroyingar eisini hava vitan, kunnleika og royndir, ið íslendingar kunnu fáa gagn og gleði av.
- Björn Bjarnason var ógvuliga hugtikin av, hvussu frammalaga vit eru innan kunningartøkni í miðnámsskúlanum. Hann vitjaði á handils- og studentaskúlanum á Kambsdali og sá, hvussu framkomin skúlin er á økinum og hvussu væl skipanin við at brúka teldu í frálæruni roynist. Tí er tað væl hugsandi, at einir 3-5 íslendskir lærarar koma higar at seta seg inn í tað, vit duga á økinum, sigur Signar á Brúnni, landsstýrismaður í undirvísingar- og mentamálum.
Tað er ikki ein vika, síðani avtalan varð undirskrivað, men landsstýrismaðurin í undirvísingar- og mentamálum hevur longu fingið fyrispurning úr Íslandi, frá einum deildarleiðara á lærda háskúlanum á Akureyri, ið fegin vil hava samstarv við føroyingar. Hvat slag av samstarvi talan er um, er ov tíðliga av siga nakað um.
Væl eydnað
- Vitjanin hjá Björn Bjarnason í Føroyum eydnaðist sum heild ógvuliga væl. Hann var sera hugtikin av tí hann sá og hoyrdi. Í Fuglafirði hoyrdi hann børnini syngja og kvøða, í Nólsoy framførdu børnini dansispæl og føroyskan dans, og hann vitjaði eisini Emil Juul Thomsen, sum hann kendi frá síni tíð sum fjølmiðlamaður.
- Tað var eisini ein sera hugtakandi løta á studentaskúlanum á Kambsdali, tá ið næmingarnir hjá Eyðuni á Lakjuni í kreativu tónleikalærugreinini sungu og spældu. Tað fløvaði at hoyra og síggja, hvussu væl tey dugdu, sigur Signar á Brúnni.
