- Tað eru ikki allir lutir, sum vit sjálvi fáa gjørt av.
Soleiðis sigur Tomislav Sivic, nú tað endaliga er staðfest, at hann ikki kemur til Føroya á hesum sinni.
Orsøkin er sjúka á familjuni, og sum støðan er, hevur venjarin gjørt av, at hann ikki átekur sær nakra uppgávu yvirhøvur.
- Tað er sjálvandi keðiligt. Eisini hjá VB/Sumba, sum kom í eina keðiliga støðu av hesum. Men teir skilja tíbetur mína støðu.
- Men eg harmist eisini um hetta sjálvur. Eg hevði nakrar møguleikar fyri venjarastarvi í heyst, men eg valdi VB/Sumba, tí bæði eg og familjan ynsktu at koma aftur til Føroya. Tað gekk so ikki á hesum sinni, men vónandi verður ein nýggjur møguleiki hjá mær eina aðru ferð, sigur Tomislav, sum annars letur eina heilsu til vinir og kenningar her í Føroyum.
Nýggi venjarin er komin
Spælararnir hjá VB/Sumba hava tó vant við fullari ferð. Jóan Pauli Olsen hevur staðið fyri fyrstu venjingunum í góðan mánað, og í gjár kom so nýggi venjarin til landið.
Hesin eitur Predrag Prsic, og hann hevur í fleiri førum arbeitt saman við Tomislav Sivic.
Eisini kom Dmitri Jankovic til landið í gjár, so allur hópurin er upp á pláss, nú farið verður undir seinasta partin av fyrireikingunum til nýggja kappingarárið.
