Bretski hægstirættur í London fer í morgin at siga dóm um, hvørt WikiLeaks-stovnarin Julian Assange, kann fáa avgerðina útlevering til USA viðgjørda av nýggjum.
Tað skrivar tíðindastovan Reuters í dag.
Amerikanskir ákærar royna at fáa Assange útleveraðan, sum í USA er skuldsettur í 18 ákærupunktum fyri at hava almannakunngjørt hundraðtúsundtals loynilig skjøl á WikiLeaks í 2010.
Fyrri dagurin í rættarmálum var 20. februar. 52 ára gamli Assange var ikki sjálvur til staðar í rættinum, tí hann var illa til passar.
Men advokatar hjá avstralska journalistinum hildu seg hava prógv fyri, at amerikanska fregnartænastan, CIA, í forsetaskeiðnum hjá Donaldi Trump, hevði ætlanir um at burturflyta ella sníkimyrða Assange, meðan hann var á sendistovuni hjá Ekvador í London.
Har krógvaði Assange seg í sjey ár, til hann var tikin av bretsku løgregluni í 2019.
Trý ár seinni gav táverandi bretski innanríkisráðharrin, Priti Patel, grønt ljós til at útflýggja hann til USA.
Tað er ta avgerðina, Assange nú royna at fáa endurskoðaða.
Heilsustøðan hjá WikiLeaks-stovnaranum hevur leingi verið í fokus.
Kona hansara, Stella Assange, segði undan rættarmálinum, at maður hennara doyr, um hann verður útflýggjaður.
Samstundis segði advokaturin Ed Fitzgerald fyrra rættardagin, at vit kunnu ikki líta á trygdina hjá amerikanarum um at viðgera Assange rímuliga.
Advokaturin sigur, at Assange kann verða dømdur upp á ein grovt órættvísan máta, um hann verður útflýggjaður.
Tapir Assange málið í bretska hægstarætti, hevur hann brúkt kærumøguleikarnar í Bretlandi og kann útflýggjast innan fáar vikur.
Dómurin verður sagdur í morgin klokkan 10:30 okkara tíð.
/ritzau/
