Tað fer at nærkast, at kappingarárið í bestu íslendsku hondbóltsdeildini byrjar fyrst í september.
Føroyingafelagið í Vestmannaoyggjunum, ÍBV sum hevur Janus Dam Djurhuus og Dánjal Ragnarsson á liðnum hevur havt góðar fyrireikingar til kappingarárið.
Fyrr í dag vann ÍBV finaluna í kappingini tey nevna "Ragnarsmótið" í Selfossi á Suðurlandinum.
Í finaluni vann ÍBV stórsigur 35-22 á Selfossi. Í steðginum var ÍBV bara á odda 15-13, men í seinna hálvleiki var talan um framúr gott avrik.
Dánjal Ragnarsson skoraði fimm mál, og Janus Dam Djurhuus skoraði trý mál fyri ÍBV í dag.
Annað vikuskiftið í september skal ÍBV eisini royna seg í Europa Cup kappingini, har MK Holon úr Ísrael verður mótstøðuliðið.
