Mikudagin 15 juni fer Krabbameinsfelagið undir eitt nýtt tilboð, sum felagið ætlar skal verða afturvendandi. Talan er um tilboðið - Opið hús - sum er ætlað fólki, ið hava ella hava havt krabbamein.
Henda dagin verður opið í hølunum hjá Krabbameinsfelagnum á Grønlandsvegi 58 í Havn frá klokkan 13-15.
Høvi verður at støkka inn á gólvið til ein drekkamunn, prát við onnur í somu støðu - ella við starvsfólk hjá felagnum, um tørvur er á tí.
Krabbameinsfelagið vísir á, at tað at hitta onnur í líknandi støðu, sum tú sjálv/-ur ert í, kann gera stóran mun, tí royndirnar vísa, at tað hjálpir at tosa við onnur og seta orð á og deila ymiskar upplivingar.
- Hetta minkar um óttan, og tú fært lættari greiðu á kenslum og tonkum. Lívsmót og lívsgóðska verða størri, og dagligu avbjóðingarnar verða lættari, sigur felagið.
