Wikileaks-stovnarin, Julian Assange, hevur nú biðið hægstarætt í Bretlandi taka støðu til avgerðina hjá High Court í London, sum herfyri gjørdi av, at Assange kann sendast til Svøríkis, har hann er skuldsettur fyri neyðtøku og annan kynsligan ágang.
Teir svensku myndugleikarnir hava kravt at fáa Julian Assange útflýggjaðan, so teir kunnu avhoyra hann um skuldsetingarnar. Verjarnir hjá Assange vilja vera við, at talan er um eitt prinsipielt mál, og at hægstirættur tí eigur at taka støðu til tað.
Julian Assange hevur avsannað skuldsetingarnar, sum tvær svenskar kvinnur hava reist ímóti honum. Hann vil vera við, at verður hann sendur úr Bretlandi til Svøríkis, fara amerikanararnir at biðja um at fáa hann til USA, so hann kann dragast fyri rættin har og ákærast fyri njósning í sambandi við tær nógvu avdúkingarnar hjá Wikileaks.
