Tað er ikki smávegis av peningi, sum kommunurnar í Sandoynni seinastu tvey árini hava brúkt upp á asfalt til kommunalu vegirnar kring um í bygdunum.
Men, hesin peningur er ikki brúktur til stuttleikar. Trong fíggjarlig kor gjøgnum fleiri ár er partvís atvoldin til, at nógvir vegir inni í bygdunum hava ligið í órøkt.
Sands kommuna kom niður um eina álíkning í skuld fyri eini tíð síðan, og seinni kom eisini Skopunar kommuna niður um eina álíkning.
Og nú gongur betri fíggjarliga í báðum teimum størstu kommununum í Sandoynni, eins og tær smærru kommunurnar eisini eru rímiliga væl fyri í mun til fólkatalið.
Tað var longu í fjør, at Skálavíkar kommuna syrgdi fyri, at kommunalu vegirnir vórðu asfaltteraðir, og her var tað EM Asfalt, sum gjørdi arbeiðið.
Tá kommunalu vegirnir vórðu asfaltteraðir í Skálavík, og fólk í bygdini fingu høvi at lata tún og parkeringspláss asfaltera, vóru tey fleiri, sum tóku av og rindaðu fyri hetta sjálvi.
Tilsamans asfaltteraði EM Asfalt fyri einar tvær miljónir krónur í Skálavík.
Í ár asfaltterar Sands kommuna fyri stívliga fýra miljónir krónur, og her er tað Landsverk, sum ger arbeiðið. Í Skopun asfaltera Kreton fyri umleið 2,5 miljónir krónur.
Samanlagt verður asfaltterað í Sandoynni í ár og í fjør fyri umleið tíggju miljónir krónur, tá mvg'ið er roknað uppí.
