Ársins bestu lýsingar kosnar

Ráðið fyri Ferðslutrygd, Tryggingarfelagið Føroyar og Visit Faroe Islands høvdu tær bestu lýsingarnar í fjør

Á ársveitslu hjá Felagnum Føroysk Marknaðarfólk, ið er áhugafelag fyri fólk, ið arbeiða innan marknaðarføring í Føroyum, í gjárkvøldið, varð avdúkað, hvør áttu tær bestu føroysku lýsingarnar í fjør.

Talan var um tríggjar ymiskar virðislønir, sum føroyski brúkarin kundi atkvøða um.

Úrslitið varð, at nýggja átakið hjá Visit Faroe Islands, gjørdist ársins besta marknaðarátak í fjør.

Ársins bestu prentlýsing átti Tryggingarfelagið Føroyar fyri prentlýsingina ”Vit stuðla ikki bara einum liði. Vit stuðla einari tjóð”, sum varð gjørd í samband við Oyggjaleikirnar á Bermuda í fjør.

At enda gav føroyski brúkarin stuttfilminum ”Ránið” hjá Ráðnum fyri Ferðslutrygd, ið vendir sær serliga til ung fólk, heiðurin sum ársins besta sjónvarpslýsing í farna ári.

Men harafturat gav Felagið Føroysk Marknaðarfólk eisini klædnahandlinum, Skálkur Man, í SMS eitt heraklapp fyri at bróta upp úr nýggjum. Tey halda, at handilin hevur flutt mørk, samstundis sum at tey virða og heiðra føroyska ymiskleikan við at hava modell í nógvum ymiskum støddum at vísa klæðini fram.

Á myndini síggjast tey, sum vunnu. Frá vinstru eru tey: Eiler Fagraklett, Tryggingarfelagið Føroyar, Brynhild Høgnadóttir, Ráðið fyri Ferðslutrygd, Janus Poulsen, Skálkur Man, Linda Kølleskov, SMS, Gurðið Højgaard og Súsanna Sørensen, Visit Faroe Islands.