EB/Streymur-B68 3-1 (1-1):
EB/Streymur vísti ikki nakað sannførandi spæl, tá ið teir á heimavølli fingu vitjan av B68. Toftamenn stríddust sera væl, og hetta gjørdi uppgávuna hjá steypavinnarunum úr Sundalagnum trupla.
Eingin fótbóltsuppliving
Veðurlíkindini við Margáir vóru á góðari leið. Nøkur vátaslettingsæl vóru at sjá, men hetta darvaði ikki spælinum nakað serligt. Tó var fyrri hálvleikur ikki nakar væl leiktur hálvleikur. B68 stóð væl á vøllinum, og hetta sá út til at bremsa spælinum hjá EB/Streymi, sum ofta hevur sæð betri dagar. B68 royndi seg mest við longum bóltum, og hetta var ikki júst ynskið hjá heimaliðnum, sum av hesi orsøk kom til at geva nakrar málmøguleikar til B68.
Hóast yvirvág til B68, var tað heimaliðið, sum fekk fyrsta málið. Mikkjal Thomassen fekk bóltin á miðjum vølli, og spældi bóltin víðari til Marna Djurhuus. Marni legði síðan ein bleytan bólt til Arnbjørn Hansen, sum vísti hvussu vandamikil hann er, og sendi bóltin í netið til 1-0.
B68 fór tó ikki niður við høvdinum, og hildu fram við at stríðast. Hetta gav úrslit stutt undan hálvleikinum, tá ið teir fingu tillutað brotsspark. Hetta brotssparkið umsetti Jann Ingi Petersen til mál, og so kundi B68 sleppa til hálvleiks við javnleiki 1-1.
Arnbjørn gjørdi bart
EB/Streymur fekk um endan í seinna hálvleiki, og byrjaði at fáa betri skil á uppspælið. Í løtum sást sera gott spæl, og tað var eisini hetta, ið førdi til, at heimaliðið legði seg á odda. Eitt væl spælt álop í høgru síðu endaði við, at innskifti Marcell Balog sendi bóltin fyri føturnir á Arbirni Hansen, sum við sínum næsta máli legði EB/Streym á odda 2-1.
Felagsliðið úr Sundalagnum fekk enn eitt mál í dystinum. Hanus Eliasen legði væl innfyri úr høgru, og hvør annar enn Arnbjørn Hansen setti bóltin í netið. 3-1 gjørdist endaliga úrslitið, og við sínum trimum málum gjørdist Arnbjørn Hansen stóri munurin millum liðini, sum ikki góvu væl uppmøttu viðhaldsfólkunum nakra stóra fótbóltsuppliving.
EB/Streymur hevur framvegis fult stigatal við seks stigum fyri tveir dystir, meðan B68 má halda fram við at jagstra teirra fyrstu stig.
