Arnbjørn er fantastiskur

Barometrið fyri vánirnar, sum Jákup Martin Joensen, venjari, og Arnbjørn Hansen, hjálparvenjari, halda seg hava fyri at vinna úrtøku úr dystunum, er, hvønn leiklut hjálparvenjarin eigur á vøllinum.

Tá ið EB/Streymur spælir ímóti teimum trimum ovastu er leikluturin á vøllinum ofta ikki so stórur hjá hjálparvenjaranum. Tá ið EB/Streymur dystast við tey niðastu, er Arnbjørn Hansen ofta á vøllinum. Viðhvørt millum teir fyrstu ellivu og ofta innskiftari.

Í góðveðrinum í kvøld vitjaði ÍF við Margáir. Arnbjørn Hansen var millum teir fyrstu ellivu hjá EB/Streymi. Tað boðaði frá, at venjararnir hjá EB/Streymi roknaðu hetta at vera møguleika fyri at vinna úrtøku.

Hjá EB/Streymi hevur tað gingið væl seinastu ferðirnar. EB/Streymur hevði undan dystinum ímóti ÍF vunnið bæði ímóti TB og AB.

Eisini í kvøld vann EB/Streymur. Fyrri hálvleikur var málleysur, og sigursmálið varð skorað, tá ið tað restaðu stórir tíggju minuttir.

Rói H. Olsen, sum tíggju minuttir frammanundan varð skiftur inn á miðvallarpláss í høgru, legði neyvt til handara stólpa, og har stakk Arnbjørn Hansen seg fram og stýrdi bóltin dygst inn við stólpan.

Hetta var annað málið hjá Arnbjørn í ár. Nú hevur hann til saman skorað 154 mál í landskappingini í bestu deildini. Í kvøld lyfti Arnbjørn Hansen seg eitt mál framum Jákup á Borg. Arnbjørn er nú næstbesti á máltindinum. Tað er bara Klæmint A. Olsen (195), sum hevur skorað fleiri mál enn Arnbjørn Hansen.

Talan var um javna uppgerð. ÍF hevði fleiri góðar møguleikar at leggja seg á odda. Næst við var tað, tá ið EB/Streyma liðformaðurin Andrass Ó. Olsen bjargaði á málstrikuni, tá ið Uros Stojanov sendi bóltin framvið Róa Zachariasen í heimamálinum.

Eftir at EB/Streymur hevði lagt seg á odda, hevði heimaliðið gott álop, sum var um reppið at bera økta leiðslu við sær. Eftir álop í høgru og útfrá sending smekkaði Gestur B. Dam til, men ÍF málverjin Jákup Nolsøe Olsen bjargaði meistarliga við beinparadu.

Tepri sigurin ber við sær, at EB/Streymur nú hevur vunnið tríggjar dystir á rað, og at EB/Streymur nú hevur 19 stig og bara er eitt stig aftanfyri ÍF.

13. september fær ÍF vitjan av B36, meðan EB/Streymur fær vitjan av Víkingi.

EB/Streymur – ÍF 1-0 (0-0)

1-0: Arnbjørn Hansen 77.

Dómari: Bjarki Danielsen

EB/Streymur: Rói Zachariasen – Árni G. Olsen, Mikkjal Hellisá, Andras Ó. Olsen, Ragnar B. Danielsen – Tóki Johannesen, Hjalti K. Djurhuus, Bárður Olsen, Símun Sólheim (Rói H. Olsen, 65.) – Gestur Bogason Dam, Arnbjørn Hansen

Gult kort: Rói H. Olsen

Venjari: Jákup Martin Joensen

ÍF: Jákup Nolsøe Olsen – Sjúrður Pauli Nielsen (Sámal Joensen, 90.), Jens Joensen, Jan Ó. Ellingsgaarad, Andy Ó. Olsen – Hans Jákup Lervig (Bogi A. Løkin, 78.), Karl A. Løkin, Hákun Edmundsson, Ari Ó. Ellingsgaard (Dánjal á Lakjuni, 78.) – Gundur E. Petersen, Uros Stojanov

Gult kort: Dánjal á Lakjuni

Venjarar: Hans Jørgen Djurhuus og Ólavur Larsen

10. september

KÍ - HB

NSÍ - B36

13. september

ÍF - B36

Skála - KÍ

EB/Streymur - Víkingur

HB - NSÍ

AB - TB