Tá ið kvívíkingar og argjamenn fylgdust norður aftur, eftir at teir høvdu kappast á Jóansøku í Vági, var tað einki – púrt einki – sum bendi á, at Kvívíkingur á Ólavsøku ikki skuldi taka ímóti gullkrónunum sum tekin um, at kvívíkingar høvdu vunnið meistaraheitið.
Soleiðis gekk tað ikki. Eftir ólavsøkuróðurin vísti stigatalvan 44 stig til Kvívíkingin og 44 stig til Argjabátin. Tá ið tað stendur á jøvnum siga reglurnar, at tann báturin, sum var stinnari í ólavsøkuróðrinum, er meistari, og í tí kappingini var eingin ivi:
Argjabáturin stakk seg beinanvegin framum hinar bátarnar, og Argjabáturin var fremstur alla tíðina. Á málinum var hann eina hálva bátslongd frammanfyri Kvívíking.
Kvívíkingar fingu betri start hesa ferð, enn teir hava fingið seinastu ferðirnar, men tað var ikki kappingina um fremsta plássið, sum Kvívíkingur fram við Molanum vóru noyddir at savna seg um. Heldur var tað um næstfremsta plássið, har Fríggjarin eina løtu var frammanfyri Kvívíking.
Á málinum var hálvur stavnurin á bláa Kvívíkingi frammanfyri hvíta stavnin á Fríggjaranum, meðan Árnfirðingur fyri fimtu ferð í ár endaði á fjórða plássi. Hinar báðar ferðirnar var hann nummar trý.
Argjabáturin endurvann FM heitið, hóast hann bara vann tríggjar ferðir, og hóast hann á Eystanstevnu endaði á triðja plássi.
Kappingarárið hjá kvívíkingum endaði ikki soleiðis,sum tað sá út til, at tað skuldi gera, tá ið fýra av sjey kappingum vóru avgreiddar. Samstundis sum Argjabáturin rættuliga kom fyri seg, so kostaði tað kvívíkingum gullkrónurnar, at teir bæði á Fjarðastevnu og Vestanstevnu komu á mál aftanfyri bæði Argjabátin og Fríggjaran, sum so rudduliga vann kappingina um bronsukrónurnar, men hesa ferð akkurát ikki megnaði at halda tørn um næstfremsta plássið, ið hann hevði vunnið tvær tær undanfarnu ferðirnar.
Vertirnir vóru blíðir, tí Ørvur og Knørrur fylgdu øllum hinum til dørs!
1 Argjabáturin 04:13.03
2 Kvívíkingur 04:15.05
3 Fríggjarin 04:15.08
4 Árnfirðingur 04:17.11
5 Ørvur 04:25.06
6 Knørrur 04:26.02
Endaliga støðan
1 Argjabáturin (FM vinnari) 44
2 Kvívíkingur 44
3 Fríggjarin 36
4 Árnfirðingur 30
5 Ørvur 18
6 Knørrur 17
