Avtalan hevur við sær, at búmerkið hjá ANSNI verður sjónligt á troyggjunum hjá bæði 1. mansliði og 1. kvinnuliði hjá Kyndli komandi kappingarár.
ANSNI er trygdarfelag, sum hevur til endamáls at veita einstaklingum og virkjum ymisk sløg av trygdarloysnum í eini tíð, har váðin allatíðina broytist. Felagið heldur til í húsunum yvir av Effo-støðini í Gundadali, ið fyrr vóru støð hjá Bil.
Anna Rein, forkvinna í Kyndil, fegnast um avtaluna við ANSNI:
– Nógv fíggjarlig orka krevst at reka eitt hondbóltsfelag, og at ANSNI hevur játtað at gerast okkara høvuðsstuðul, gevur okkum gott treysti at fara undir kappingarárið. Talan er um eina professionelt rikna fyritøku, sum vit gleða okkum at samstarva við, sigur hon.
Stjórin í ANSNI, Helgi O. Justinussen, fegnast eisini um avtaluna:
– Kyndil hevur altíð staðið seg væl, serliga hjá monnunum, og vit hava lagt til merkis, at felagið eisini ætlar at gera um seg hjá kvinnunum í ár og stendur seg sera væl í ungdómsdeildunum. Tí fegnast vit um at stuðla felagnum, sigur hann.
ANSNI verður eisini sjónligt á nýggju heimasíðuni hjá Kyndli, ið verður almannakunngjørd í sambandi við nýggja kappingarárið, og á tiltøkum, sum Kyndil fer at skipa fyri.
Aðrir stuðlar hjá 1. mansliði hjá Kyndli komandi kappingarár verða Eik, Effo og SMS.
