Annfinn Brekkstein, býráðslimur í Havn fyri Sambandsflokkin, er tilreiðar at samstarva við meirlutan í býráðnum um fíggjarpolitikkin hjá býráðnum hesi næstu árini. Tað gjørdi hann meirilutanum greitt á býráðsfundi í Havn hóskvøldið.
Sambandsflokkurin er ikki við við í meirilutanum í Tórshavnar Býráð, har Fólkaflokkurin, Tjóðveldi og Framsókn hava skipað samgongu, ímeðan Sambandsflokkurin og Javnaðarflokkurin sita í andstøðu.
Men tá ið Býráðið viðgjørdi fíggjarætlanina fyri næsta ár, gjørdi Annfinn Brekkstein greitt, at undir ávísum treytum er hann bæði til reiðar at taka undir við fíggjarlógini, og við eini langtíðar íløguætlan, sum samgongan er í ferð við at leggja.
– Fái er sett míni fingramerki á fíggjarætlanina fyri næsta ár, og fái eg míni fingramerki á langtíðar íløguætlanina, eri eg til reiðar at taka undir við teimum, segði hann.
Í hesum sambandi nevndi hann eitt mál, hann hevur gjørt nógv burtur úr í seinastuni. Og tað er, at hann vil avtaka skipanina við ókeypis busskoyring við Bussleiðini.
Hann vil heldur hava eina skipan, har borgarar í Tórshavnar Kommunu fáa eitt borgarakort, sum gevur teimum sersømdir til ymsar tænastur í kommununi, eitt nú við Bussleiðini. Hann heldur, at vanlig fólk, eiga at rinda fyri at koyra við Bussleiðini, men hinvegin hevur hann einki ímóti, at pensjónistar, lesandi, og kanska aðrir bólkar við, framvegis koyra ókeypis.
Og í øllum førum heldur hann, at fremmandafólk eiga at rinda fullan ferðaseðil við Bussleiðini.
Hann sigur, at er meirilutin í býráðnum sinnaður at ganga honum á møti í hesum við borgarakortunum, er hann eisini sinnaður at taka sína ábyrgd av fíggjarpolitikkinum hjá býráðnum.
Og Annika Olsen, borgarstjóri, tók væl ímóti innbjóðingini um samstarv frá Annfinni Brekkstein. Og hon vísir als ikki tankanum um eitt borgarakort frá sær.
– At seta eina skipan við borgarakorti í gildi, kann vera skilagott, tí tað kann eisini útvega kommununi inntøkur, sigur hon.
Hvørjar tænastur, fólk við borgarakorti skulu fáa, verður so ein samráðingarspurningur. Men borgarstjórin leggur dent á, at tað er eitt mál, sum ikki er til samráðingar. Og tað er, at tað skal framvegis verða ókeypis hjá borgarum í Tórshavnar Kommunu at koyra við Bussleiðini.
– Bussleiðin verður framhaldandi ókeypis fyri havnarborgarar, tað liggur rimmarfast, sigur hon.
Men um so onnur skulu rinda, er so ein annar spurningur. Í hesum sambandi er tað ein spurningur um bygdafólk skulu rinda fyri at koyra við Bussleiðini, ella um hon skal vera vera ókeypis fyri allar føroyingar, so at tað bara eru útlendingar, sum skul rinda.
– Ein skipan við einum borgarakorti er avgjørt ein skipan, vit kunnu tosa um at seta í verk, sigur borgarstjórin.
