Leygardagin 25. juli fyllir Anna Sofía Vidtfeldt, fødd Poulsen, 50 ár. Anna Sofía býr á Sandi, men er ættað úr Skopun. Hon er dóttir Kristoffer og Siborg Poulsen, og er næstyngst av 7 systkjum. Pápi hennara var m.a. handilsmaður, og í handlinum í Búrið sleit hon barnaskógvarnar. So tað var kanska ikki so undarligt, at eftir at hon hevði starvast í banka í uml. 20 ár, valdi at skifta starv og fara at reka handil og bilverkstað saman við manninum, Karl Vidtfeldt.
Anna Sofía er ógvuliga aktiv í frítíðini og røsk til tað handaliga, men tey flestu kenna hana frá dansinum, har hon og Karl hava gingið til frálæru og luttikið á dansistevnum runt um í landinum. Umframt hetta undirvísa tey saman við øðrum børnunum á Sandi í dansi.
Anna Sofía og Karl eiga børnini Eyðnu, Kristoffur, Jóhannu og Elsubet, og sætta ommubarnið er á veg.
Dagurin verður hildin í Ungmannafelagnum Virkinum á Sandi leygarkvøldið.
