Seinastu umførini hevur gingið illa í hond hjá Andriasi Edmundssyni og liðfeløgunum í Wisla Plock í næstbestu pólsku fótbóltsdeildini.
Undan dagsins dysti á heimavølli móti Warta Poznan hevði Wisla Plock bert vunnið trý stig í teimum seinastu seks dystunum.
Í dag gekk sum eftir ánni hjá Wisla Plock, ið vann stórsigur 4-0 á Warta Poznan. Í steðginum var heimaliðið á odda 2-0.
Piotr Krawczyk við tveimum málum, Krystian Pomorski og Dominik Kun syrgdu fyri málunum í stórsigrinum. Andrias spældi allan dystin.
Wisla Plock heldur vetrarferiu á einum fimta plássi við 33 stigum. Fýra stig eru upp til Arka Gdynia, ið er á øðrum plássinum sum gevur beinleiðis uppflyting til bestu deildina.
Liðini sum enda á endastøðunum millum nummar trý og seks aftaná lokið grundspæl spæla uppflytingardystir.
Kappingin í næstbestu pólsku deildini byrjar aftur 15. februar.
