Eitt ár er síðani guitarsnillingurin, ið eisini náddi at verða kosin besti guitarleikari í Føroyum, valdi at fara foldum frá. Á sjálvum psykiatridegnum.
Rasmus var tyngdur av sálarligum tunglyndi, og fyri ári síðani var honum ovboðið.
Deyði hansara setti ferð á arbeiðið at fáa sonevnt fauntainhouse í Føroyum, eitt stað, har sálarliga tyngd kunnu koma fyri seg og fáa hvílu. Vinfólk skipaðu fyri tiltøkum hesum at frama og ljós varð sett á sálarsjúku.
Rasmus Rasmussen var í síni tíð eisini við til at varpa ljós á trupulleikarnar hjá samkyndum, tá hann var álopin og kom illa fyri. Vælkenda kjakið um 266b tók seg upp og trupulleikarnir hjá einum bólki í samfelagnum komu fram í ljósið, og kanska er ikki ov nógv sagt, at eitt sindur av tí tabu-kenda, sum hevði valdað á økinum, hvarv. Rasmus gjørdi mun, sigast kann ikki annað.
Í kvøld skipar Sinnisbati fyri tiltakið í Perluni í Tórsgøtu, har Regin Jóanesarson greiður frá um at liva við tunglyndi og Grækaris D. Magnussen greiðir frá, hvussu tað er at liva við bipolar disorder - tað ið fyrr oftast varð rópt at vera manio-depressivur.
