Fýra javnleikir og tepur NSÍ sigur á heimavølli ímóti 07Vestur. Tað var fasittið síðsta vikuskifti, tá ið trettanda umfar í EFFO deildini var á skránni. Spælarar og venjarar og eygnavitni staðfestu, at talan var um rættuliga linligt umfar. Tað sást eisini á málskjótingini. Ikki síðani síðsta umfarið í 2008 er tað komið fyri áður, at endastøðan í trimum dystum var tann sama, sum hon var, tá ið dómarin bríkslaði fyri fyrstu ferð, og hetta var fyrsta ferðin síðani 27. umfar í 2008, at bara fimm mál vórðu skorað í einum umfari.
Tað hevur ofta verið tikið til, at altjóða uppgávurnar kosta í heimligu kappingini. Bæði tá ið feløgini taka lut í europeisku kappingunum, og tá ið landsliðið spælir. Serliga nógv kennist tað aftur, tá ið talan er um altjóða avbjóðingar uttanfyri landoddarnar.
Tí var tað ikki so óvæntað, at tað í umfarinum, sum var á skránni síðsta vikuskifti, gekk soleiðis, sum tað nú eina ferð gjørdi. Í fleiri feløgum vóru venjingarnar tær báðar vikurnar upp undir vikuskiftið eyðkendar av, at fleiri av bestu spælarunum vóru burtur í fótbóltsørindum á U-21 landsliðnum ella A-landsliðnum, og í vikuskiftunum vóru dystirnir eyðkendir av, at lyklaspælararnir ikki høvdu yvirskotið, sum teir plaga at vísa, tá ið dystirnir skulu avgerast.
Nú er nýtt umfar á skránni. Sunnukvøldið verður 14. umfar liðugt spælt. Tá verður kappingin meiri enn hálvrunnin, og tá fer tað ivaleyst at bera til at staðfesta, at spælararnir hesa ferð vístu størri yvirskot, enn teir gjørdu seinast, og at liðini hesa ferð stríddust meiri fyri at vinna, enn tey gjørdu seinast, tá ið tað í flestu førum fyrst og fremst ráddi um at binda fyri í verjupartinum.
