- Ræðisrætturin til føroyska tilfeingið skal verða á føroyskum hondum.
Tað staðfesti Bárður á Steig Nielsen, formaður í Sambandsflokkinum, á landsfundinum hjá flokkinum í morgun.
Og samstundis ger hann greitt, at fiskiríkidømið er ogn Føroya fólks Men hinvegin kunnu reiðarar fáa ein brúksrætt í eina ávísa tíð, menn tann brúksrættin skulu teir gjalda fyri.
- Soleiðis kann vinnan gera íløgur undir tryggum karmum, sigur hann.
Bárður á Steig Nielsen ger eisini greitt, at sambandsflokkurin góðtekur ikki rullandi loyvi og óavmarkaðan ognar- og ræðisrætt til vinnuna.
Heldur ikki skulu bankar fáa veð í veiðiloyvum, tí tað svarar til at avhenda ognar- og ræðisrættin til bankarnar.
Tvørtur ímóti vil Sambandsflokkurin byggja á grundregluna um, at fiskivinnan skal vera rikin eftir marknaðartreytum, uttan at fáa rakstrarstuðul, og á burðadyggum grundarlagi.
Samstrundis skal tað vera eitt krav, at øll fiskirættindi á heimshøvunum verða gagnýtt til fulnar. Tað merkir, at allur fiskurin verður gagnnýttur, og at alt skal upp á land í Føroyum.
- Nýggj fiskirættindi skulu vinnast nær og fjar, og týdningarmest av øllum er at alt skal útflytast sum matvørur, heldur enn sum rávørur, sigur Bárður á Steig Nielsen.
