Nú skal skjøtil setast á eitt mál, um øll, ið fáast við Sosialt arbeiðið í Føroyum, leingi hava trákkast eftir.
Og tað er arbeiðið at kanna og broyta stuðulsfólkaskipanina.
Tað eru rættiliga nógv fólk kring alt landið, sum eru stuðlar hjá børnum og vaksnum, sum onkusvegna eru illa fyri, tað verið seg av breki, menningartarni ella av sosialum orsøkum.
Men sum Ásvør Joensen greiðir frá omanfyri, er tað nógv í hesi skipanini, ið ikki virka nóg væl og tað hevur eisini leingi verið væl kent, at tey, sum hava við skipanina at gera, antin sum starvsfólk, ella sum brúkarar, halda ikki, at hon virkar nóg væl.
Men á fundinum, sum Javni skipaði fyri mánakvøldið, greiddi Helena Dam á Neystabø, landsstýrismaður í Almanna og heilsumálum frá, at nú er hol sett á arbeiðið at endavenda hesi skipanini.
Hon segði, at í næstum verður ein projektleiðari settur til at endurskoða alla stuðulsfólkaskipanina, sum hon er.
? Endamálið við hesum arbeiðnum er sjálvandi at fáa eina nágreiniliga lýsing av, hvussu stuðulsfólkaskipanin virkar í dag. Men endamálið er eisini at taka støðu til, um lógarheimildirnar eru ílagi.
Hetta segði hon, tí løgfrøðingar hava leingi ivast í, um lógarheimild yvirhøvur hevur verið til at útbyggja hesa skipanina so nógv, sum hon er útbygt.
Landsstýrismaðurin segði, at endamálið við arbeiðnum er eisini at gera tilmæli um, hvussu vit kunnu fáa skipanina at virka betur.
? Í hesum sambandi hugsa vit fyrst og fremst um, hvussu vit tryggja eitt nóg fjølbroytt, fakligt grundarlag til at veita ein stuðul, sum er nøktandi, tí vit tosa um fólk, við ógvuliga ymsum brekum og sosialum fortreytum og tískil eisini við ógvuliga ymiskum tørvi.
Helena Dam á Neystabø sigur, at saman við projektleiðaranum, skal eisini ein stýrisbólkur setast og tá ið farið verður til verka, verða sjálvandi avvarandi feløg og stovnar spurd til ráðs.
Hon segði, at hon vónaði ikki, at arbeiðið fór at taka alt ov langa tíð.
? Men hetta er eitt sera stórt og umfatandi øki so vit skulu ikki fyrigykla okkum, at hetta verður gjørt í eini handavending.
Tískil er útvið eitt ár sett av til arbeiðið.
