Alment verkfalstiltak verður í Ítróttarhøllini í Runavík mánamorgunin, hin 20. februar klokkan 10. Tað eru pedagogarnir í Eysturoy, sum skipa fyri hesum tiltaki.
Á skránni verða røður, felagssangur og føroyskur dansur. Eisini verður kaffi, te og køkur at fáa.
Røðarar á verkfalstiltakinum í Runavík verða forkvinnan í Føroya Pedagogfelag, Maud Wang Hansen, og tingfólk úr samgongu og andstøðu verða eisini við.
Eysturoyarbólkurin hjá Føroya Pedagogfelag sigur, at foreldur, ið eru rakt av verkfallinum, verða við til tiltakið, eins og ein pedagogur úr Eysturoynni fer at siga nøkur orð.
- Komið og stuðlið tiltakinum. Øll eru hjartaliga vælkomin, sigur eysturoyarbólkurin hjá Føroya Pedagogfelag.
