Almennar nevndir kosta 14,3 milliónir um árið

Landið brúkar 14,3 milliónir krónur um árið í fundapengum til 762 nevndarsessir í 145 nevndum

Javnan verður ljós kastað á almennar nevndarsamsýningar, og javnan hoyra vit politikarar siga, at nú skulu greiðar reglur gerast.

Í gjár visti Kringvarpið at siga, at formaður í nevndini í Landsbankanum fær 16.000 kr í samsýning um mánaðin, hóast lønardeildin í Fíggjarmálaráðnum hevur mælt til, at hann skal fáa 10.000 krónur um mánaðin. Nevndin í Landsbankanum hevði annars ætlað, at hann skuldi fáa 24.000 krónur um mánaðin. Hóast hon gekk frá tí ætlanini, so gekk nýggja nevndin í Landsbankanum kortini ikki Fíggjarmálaráðnum á møti.

Tað er rættiliga ymiskt, hvussu nevndarlimir verða løntir í teium 145 almennu nevndunum og ráðunum. Fleiri eru fastlønt, meðan ein hópur fær fundarpengar.

– Nevndirnar eru rættiliga fjølbroyttar og hava rættiliga ymisk virkisøki. Nógvar nevndir og ráð hava týdning fyri rættarsamfelagið, tryggja sakligar og væl grundaðar avgerðir og holla ráðgeving, skrivar Løgmansskrivstovan á heimasíðuni.

Løgmansskrivstovan bólkar nevndirnar soleiðis:

• Kærunevndir (t.d. Kærunevndin í almanna- og heilsumálum)

• Óheftar nevndir, sum hava lógarheimild til at taka sjálvstøðug stig, eitt nú eftirlit (t.d. Høvuðsbarnaverndarnevndin)

• Umsóknarnevndir (t.d. Mentanargrunnur Landsins)

• Ráð, sum ikki taka fyrisitingarligar avgerðir, men sum geva øðrum myndugleika, ofta landsstýrismanni, ráð um, hvussu ein skal bera seg at í serstøkum sum almennum málum (t.d. Ráðið fyri brekað)

• Nevndir, sum fyrisita sjálvstøðuga, løgfrøðiliga eind, stovnsetta av tí almenna, privatum ella báðum í felag, eitt nú partafeløg (t. d. P/F Føroya Tele og Framtaksgrunnurin)

Rættiliga vanligt er, at nevndarlimir fáa fundarpening. Galdandi upphæddir eru hesar:

Fundir styttri enn 3 tímar: 540 kr

Millum 3 og 5 tímar: 1.080 kr

Longri enn 5 tímar: 1.620 kr

Nakrar niðurstøður og lyklatøl:

• 148 nevndir eru sambært dátugrunninum hjá Løgmansskrivstovuni (kirkjuráðini eru ikki tald við)

• 762 nevndarsessir eru sambært dátugrunninum

• Samsýningarnar í almennum partafeløgum eru munandi hægri enn í øðrum nevndum

• Vinnumálaráðið og Mentamálaráðið varða av flestu nevndarsessunum (UVMR:137 MMR: 170)

• Árligu føstu samsýningarnar eru 11,5 mió kr. (2013)

• Í 2013 vóru 2,8 mió. kr goldnar út í fundarsamsýningum/fundarpengum (gjøgnum skipanina hjá Gjaldstovuni)

• Nógv fleiri menn enn kvinnur sita í nevndarsessunum

• Fleiri kærunevndir eru, sum ikki eru knýttar til Føroya Kærustovn.

Tal av nevndum og nevndarsessum

Viðm.: Kirkjuráðini eru ikki tald við. Eitt kirkjuráð er í hvørjari av teimum 60 kirkjusóknunum. Tils. eru 366 kirkjuráðslimir.

Samsýningar:

Viðmerkjast skal, at hetta eru bert tær mánaðarligu samsýningarnar. Fundarpeningurin verður goldin við støði í tali av fundum og fundarlongd. Sambært tølum frá Føroya Gjaldstovu, vóru í 2013 goldnar 2.805.478 krónur út í fundarsamsýningum. Hetta er tað, sum er útgoldið gjøgnum skipanina hjá Gjaldstovuni.

Brúka vit 2013 sum grundarlag, kunnu vit siga, at fastar samsýningar og fundarsamsýningar árliga eru á leið 14,3 mió kr.

Yvirlit yvir allar nevndarlimir, í stavrað, nevndarheiti og samsýningar sæst VIÐ AT TRÝSTA HER