Vinnarin av danska Melodi Grand Prixnum gjørdist 20 ára gamla Leonora við sanginum "Love is Forever". Hon vann sannførandi við 42 prosent av atkvøðunum millum tey síðstu trý, ið vóru í finaluni.
Sigmund Tróndheim stóð seg sera væl í kvøld og kom eisini í finaluna. Hann fekk eitt flott triðjapláss við sínum sangi "Say My Name", sum nokk var tann sangurin, sum skilti seg mest burtur úr í mun hinar sangirnar.
Grønlendsku Julie Berthelsen og Nina vóru eisini í finaluni við lagnum "League of Light", og hesar báðar blivu nummar tvey. Tær sungu bæði á enskum og á grønlendskum.
Sostatt kann sigast, at allir partarnir av ríkisfelagsskapinum vóru umboðaðir í ársins Grand Prix finalu. Leonora fyri Danmark, Julie & Nina fyri Grønland og Sigmund fyri Føroyar og Danmark. Sigmund, sum hevur føroyskan pápa, segði við Vikuskiftis-Sosialin, at hann vildi sleppa at umboða bæði Danmark og Føroyar í Eurovision í Tel Aviv, um hann vann í kvøld.
