Í kvøld var lykladystur í kappingini um at sleppa undan hóttanini av niðurflyting. Fyrrverandi B36 venjarin Dan Brimsvík, sum nú stendur á odda fyri 07 Vestur, var á Svangaskarði, har fyrrverandi B36 venjarin Jákup á Borg, sum nú er B68 venjari, tók ímóti.
Í fjórða umfari vann 07 Vestur 2-1 á Svangaskarði, eftir at B68 skoraði fyrsta málið.
Í kvøld vóru tað heimamenninir, sum fegnaðust um 1-0 sigur. Tey trý stigini bera við sær, at B68 nú er á sjeynda plássi við 14 stigum. Tað er sama stigatal, sum Skála hevur, men málmunurin hjá toftamonnum er eitt vet betur, enn hann er hjá Skála.
Tað gekk rættiliga javnt fyri seg á Svangaskarði. 07 Vestur spældi seg til flestu uppløgdu málmøguleikarnar, og eitt nú høvdu Teitur Olsen, Janus Svabo Samuelsen, Emil Pedersen og Filip Brattbakk góðar royndir ímóti málinum, uttan at tað eydnaðist at fáa mál. Tað komst eisini av, at Tórður Thomsen var sannur brandur millum B68 stólparnar.
Toftamenn høvdu Jóhan Josephsen sum miðframherja, meðan Klein brøðurnir Bartal all og Villiam Emil vóru framrættaðir í hvør sínum borði. Átta minuttir eftir steðgin varð Brian Jakobsen skiftur inn á B68 liðið í roynd at styrkja um framrættaða partin, og tað var Brian Jakobsen, sum eitt korter undan leikloki vann avgerandi brotssparki. Dygst innanfyri brotsteigarmarkið fór hann um koll. Svenski dómarin Per Melin peikaði á 11 metrablettin, og tað var Alex Mellemgaard, sum setti bóltin í málið.
Síðstu løtuna skifti 07 Vestur fýra nýggjar menn inn, men tað eydnaðist ikki at skora og harvið javna. Hóast tapið er 07 Vestur ikki í vanda fyri at flyta niður. Vágamenn hava 21 stig, og tað eru 11 stig aftur til niðurflytingarpláss.
Fríggjakvøldið fær 07 Vestur vitjan av NSÍ, og sunnudagin fer B68 í Gundadal at spæla ímóti HB.
B68 – 07 Vestur 1-0 (0-0)
1-0: Alex Mellemgaard br 75.
Dómari: Per Melin
B68: Tórður Thomsen – Fríði í Túni Petersen, Áki Johannesen, Aron Reinert Hansen, Alex Mellemgaard – Andreas Pettersen, Sebastian Lau Nielsen, Bárður Ó. Jensen – Bartal Páll Klein, Jóhan Josephsen, Villiam Emil Klein
07 Vestur: Sebastian John – Kevin Egell Johnsen, Jónas Prior, Sonni Ragnar Nattestad, Filip Brattbakk – Teitur Olsen, Janus Svabo Samuelsen, Jón í Horni Nielsen – Mikkel Elbæk Jakobsen, Oddur í Haraldstovu Petersen, Emil G. Pedersen
