Albert Ellefsen heldur fram sum venjari hjá ÍF. Hann hevur havt eitt framúr kappingarár, har ÍF hevur vunnið silvur heiðursmerki longu undan seinasta umfari. Albert hevur verið í samráðingum við millum annað B36, men formaðurin í ÍF, Magnus Jørmundsson váttar nú, at Albert hevur longt sáttmálan við einum ári.
- Tað er so gott at verða í Fuglafirði, at her fert tú ikki frá uttan at tú verður tveittur út, sigur Albert Ellefsen í 3-2 sendingini hjá Kringvarpinum, sum var í dag.
Tað er ikki bara Albert Ellefsen, sum hevur longt sáttmálan. Fleiri spælarar hava eisini longt sáttmálan. Nenad Saric hevur longt sáttmálan við tveimum árum. Eisini Ari Ó. Ellingsgaard, Dánjal á Lakjni og Leivur Joensen hava skrivað sáttmálar fyri komandi kappingarár.
Hetta er annað árið á rað, at ÍF hevur vunnið silvur í landskappingini.
