-Vit eru sannførd um, at tað er GSPC, sum hevur ábyrgdina av hesum, segði algeriski innanríkisráðharrin, Noureddine Yazid Zerhouni á einum tíðindafundi stutt eftir, at tvær bumbur vóru brostnar at kalla samstundis í høvuðsstaðnum Algier. Rætt hevði hann, tí seinni í gjár átók norðurafrikanska deildin av al-Qaeda sær ábyrgdina av atsóknunum.
Tað er framvegis ikki greitt, hvussu mong mannalív bumburnar kravdu. Fyrst ljóðaði frá sjúkrahúsunum í býnum, at minst 67 fólk høvdu latið lív, men algerisku myndugleikarnir søgdu seint í gjárkvøldið, at 26 fólk vóru deyð, og at 177 vórðu særd.
Ellivu av teimum, sum doyðu, arbeiddu á einari ST-skrivstovu í algeriska høvuðsstaðnum. Teirra millum teirra var ein 39 ára gamal dani. ST-hákommiserurin í flóttafólkamálum, Antonio Guterres, segði í gjárkvøldið, at atsóknin var eitt álop á ST. Luttakararnir á veðurlagsráðstevnuni á Bali hildu tøgn eina løtu í gjár fyri at minnast tey, sum doyðu í Algier, og ST-aðalskrivarin, Ban Ki-moon, fordømdi atsóknirnar.
Hvítu Húsini í Washington kunngjørdu eitt samkenslufjarrit, og algerisku myndugleikarnir fingu tilsvarandi fjarrit frá stjórnunum í Fraklandi, Spania, Sýrialandi, Iralia, Marokko og frá ES.
