Yvirgangsfelagsskapurin Al-Qaeda mælir nú sínum stuðlum til at søkja at gongugøtuni Strøget í Keypmannahavn. Tað skal ikki gerast við skotvápnum ella bumbum, mmen við at lata sveisa rakibløð á gronina á einum bili, sum so skal koyra við nógvari ferð ígjøgnum gøtuna, har vanliga nógv fólk eru.
Áheitanin ella uppskotið stendur á internetblaðnum Inspire, sum Al-Qaeda stendur á odda fyri.
Lagt verður afturat, at tað er ikki vist, at tann, sum fullførir atsóknina, sleppur við lívinum. Men tann, sum letur lív í einari tílíkari atsókn, fær æviga samveru við Allah, skrivar felagsskapurin.
Fregnartænastan hjá donsku løgregluni hevur fyrr ávarað um, at yvirgangsmenn kunnu finna upp á atsóknir, sum eru lutfalsliga lættar at fyrireika og at fullføra.
