Formaður Javnaðarfloksins Aksel V. Johannesen fyllir 40 ár í dag.
Við sjeymíla ferð er ungi politikarin, Aksel V. Johannesen eftir bert fáum árum rokkin langt í føroyskum politikki.
Hann gjørdist varamaður Javnaðarfloksins á løgtingsvalinum í 2008. Í juli 2009 tók hann við sum landsstýrismaður í heilsumálum, og longu á vári árið eftir gjørdist hann landsstýrismaður í fíggjarmálum. Hin 5. mars 2011 varð ungi klaksvíksmaðurin valdur í formanssess Javnaðarfloksins eftir Jóannes Eidesgaard. Á løgtingsvalinum 29. oktober 2011 var Aksel V. Johannesen fyrstvaldur á Javnaðarlistanum við 1204 atkvøðum.
Aksel V. Johannesen varð føddur í Klaksvík hin 8. november 1972. Foreldrini eru Johild og Vilhelm Johannesen. Hann hevur lokið prógv sum løgfrøðingur frá universitetinum í Keypmannahavn, og virkaði sum advokatur í Havn frá 2007. Aksel V. Johannesen er giftur við Katrin D. Apol úr Havn, og saman eiga tey synirnar Luitjen og Elias Akselsson Apol.
