Real Madrid, sum hevur vunnið fýra av teimum seinastu fimm Champions League meistaraheitunum, er úti av kappingini. Púra óvæntað tapti Real Madrid heili 4-1 á heimavølli móti Ajax, eftir at hava vunnið fyrra dystin á utivølli 2-1.
Ajax, sum seinast vann Champions League í 1995, spældi sum í gomlum døgum. Hakim Ziyech og David Neres løgdu gestirnar á odda í fyrra hálvleiki. Í seinna hálvleiki økti Dusan Tadic við vøkrum skoti, men tað gekk leingi áðrenn málið bleiv viðurkent. Dómarin brúkti fleiri minuttir fyri at staðfesta, um bólturin hevði verið uttanfyri síðulinjuna í uppspælinum.
Real Madrid fekk eina vón, tá innskifti Marco Asensio sendi bóltin í stongina og inn. Men Ajax svaraði aftur bara tveir minuttir seinni, tá danski miðvallarin, Lasse Schöne, sendi fríspark beinleiðis í mál.
Tað hoyrir við til søguna, at Real Madrid mátti skifta bæði Lucas Vazques og Vinicius Junior út í fyrra hálvleiki vegna skaðar. Hartil hevði Real Madrid onkrar stórar møguleikar at skora, men eftir at hava tapt tvær ferðir á heimavølli móti Barcelona í farnu viku, so er sjálvsálitið at síggja til í botn.
Í hinari 1/8 finaluni í kvøld vann Tottenham 1-0 móti Borussia Dortmund, eftir at hava vunnið heimadystin 3-0. Málskútti var – sum so oftani fyrr – Harry Kane. Sostatt eru Tottenham og Ajax víðari til fjórðingsfinalurnar.
Champions League 1/8:
Real Madrid – Ajax 1-4 (0-2)
0-1 Hakim Ziyech, 7
0-2 David Neres, 18
0-3 Dusan Tadic, 62
1-3 Marco Asensio, 70
1-4 Lasse Schöne, 72
Ajax vinnur samanlagt 5-3
Borussia Dortmund – Tottenham 0-1 (0-0)
0-1 Harry Kane, 49
Tottenham vinnur samanlagt 4-0
