Nú er aftur galið millum báðar tjóðveldismenninar Sjúrð Skaale og Høgna Hoydal.
Og stríðið snýr seg aftur um stjórnarskipanaruppskotið.
Í lesarabrævi í Sosialinum í dag finst Sjúrður Skaale at sínum formanni fyri at siga hálvar sannleikar.
-Høgni Hoydal ber í grein í dag fólki hálvar sannleikar. Hálvir sannleikar eru tíverri ofta eisini hálvar lygnir.
I greinini, sum Sjúrður Skaale sipar til, skrivar Høgni Hoydal, at stjórnarskipanarnevndin hevur brotið eina semju og hevur givið eftir fyri donskum trýsti.
Formaðurin vísir á nýggju orðinginar í uppskotinum:
?Stjórnarskipanin virðir teir stjórnarrættarligu sáttmálar og avtalur, sum eru í gildi, tá hon verður sett í verk (...)?
Men Høgni Hoydal fer ov lætt um sannleikan:
- Høgni endurgevur bara helvtina av tí nýggja setninginum, sum er komin inn í formælið. So steðgar hann, og skrivar bara prikk, prikk, prikk, skrivar Sjúrður Skaale, sum vísir á, at í fullum líki verður m.a. Staðfest,, at eingin lóg ella sáttmáli kann setast í gildi fyri Føroyar uttan Løgtingsins samtykki.
- Gott hevði verið, um Høgni helt seg til allan sannleikan. Men sjálvandi: Hevði hann gjørt tað, hevði hann ikki fingið ta niðurstøðu, sum hann vil hava, skrivar Sjúrður Skaale.
Í síðstu viku var eisini galið millum teir báðar. Tá noyddist Sjúrður Skaale at enda biðja um umbering fyri at brúka vendingina ?óluksáliga frekt? um sín formann.
Bæði lesarabrøvini síggjast í fullum líki í Sosialinum í dag.
