Jan Nielsen, sum í dag rekur Torghúsið og kafé’ina í Saltangará, sum fyribils verður opin seinnapartar fram til jólar, hevur eisini eitt hugskot um, hvussu meira fokus kann setast á handilslívið við Skálafjørðin og aðrastaðni í Eysturoy.
Handilsmiðdepilin í Runavík liggur í løtuni í dvala, men Jan heldur, at soleiðis eigur tað ikki at vera.
- Eg haldi, at vit eiga at standa saman og brynja okkum, soleiðis at handilslívið við Skálafjørðin og aðrastaðni í Eysturoy kemur meira í fokus.
Jan Nielsen heldur, at flestir møguligir handlar og fyritøkur eiga at skipa seg í eitt nýtt og størri handilsfelag, har gjaldið til felagið verður á hóskandi støði, kanska einar 3000 krónur um árið.
- Eg ætli mær, sum tíðin gongur, at taka stig til at savna handilslívið yvir eina størri part av Eysturoy, enn vit hava sæð tað higartil, sigur Jan Nielsen.
