Stásiliga herskipið Absalon hjá donsku verjuni, kemur til Føroya um vikuskfitið og fer her at hava venjingar saman við sjóverjuskipinum Vædderen, sigur Færøernes Kommando í tíðindaskrivi.
Vant verður í Nólsoyarfirði sunnudagin 16 januar, stendur í tíðindaskrivinum.
Absalon skal saman við einum systurskipi, sum enn ikki er liðugt og navngivið, vera høvuðsstuðulin í altjóða uppgávum, sum danski herflotin í framtíðini fer at taka lut í. Skipini fara at vera útgjørd til bæði hernaðarligar og humaniterar uppgávur.
Fyrsta royndin hjá Absalon eftir at hann hevur verið í Føroyum, verður at royna, hvussu skipið klárar ymsar veðurfrøðiligar umstøður. Bæði í Norðuratlantshavinum og í tropunum, sigur Færøernes Kommando í tíðindaskrivinum.
