Sambært útlendskum miðlum er ukrainski herurin í holt við at fremja mótálop á russisku deildirnar í havnabýnum, Kherson.
Hetta er niðurstøðan hjá høgtstandandi embætisfólkum í amerikanska verjumálaráðnum, Pentagon, í dag.
Sagt verður, at russiskir hermenn kunnu koma í eina ringa støðu í Kherson, tá ukrainski herurin fer at leypa russisku deildirnar í býnum aftur.
Kherson, sum liggur við Svartahavið, er hin einasti av størru býunum í Ukraina, sum russiski herurin hevur havt ræðið á.
Men, í USA eru tey nú farin at ivast í, hvør veruliga hevur valdið í býnum har suðuri í Ukraina.
- Vit hava ikki fingið váttað, hvør hevur valdið í Kherson, men alt bendir á, at býurin ikki longur er líka greitt undir russiskum eftirliti, sum hann hevur verið.
Høgtstandandi embætisfólk í amerikanska verjumálaráðnum vísa á, at tað var longu tíðliga í mars, at Ukraina viðurkendi, at russar høvdu tikið valdið í býnum.
Men, nú er ivamál um, hvør hevur veruliga valdið, siga somu keldur.
Í havnabýnum Kherson búgva umleið 330.000 fólk.
Eydnast tað ukrainska herinum at taka valdið í býnum aftur, meta embætisfólk í Pentagon, at russiskir hermenn í býnum kunnu koma í eina trupla støðu.
Í vikuni hevur annars ljóðað, at ukrainskar herdeildir hava rikið russiska herin longur burtur úr økinum kring høvuðsstaðin, Kiev.
At ivi nú eisini er um valdið í Kherson har suðuri í landinum kundi bent á, at russiska krígsmaskinan viknar av hørðu ukrainsku mótstøðuni á fleiri hermótum.
##med2##
